الرئيسية » قصص نجاح » محمد الظاهري يحكي لعرب دايت تفاصيل تحقيق حلم الرشاقة
محمد الظاهري يحكي لعرب دايت تفاصيل تحقيق حلم الرشاقة

محمد الظاهري يحكي لعرب دايت تفاصيل تحقيق حلم الرشاقة

في الحياة عادةً ما تكون لنا أحلام حلوة.. أشياء نريد نحصلها.. او نريد نعيشها.. لكن للاسف تعيقنا الظروف أحياناً عن تحقيق أحلامنا..

-

كان لي عدة احلام من وانا صغير، بعضها لها علاقة في شخصيتي وفي تعبي ومجهودي، بعضها لها علاقة بدراستي، طبيعي تواجهني عدة صعوبات في تحقيق احلامي، وهذا الشي يصير في حياة أي شخص..
اكبر عائق كان يقيدني عن تحقيق طموحي هو الوزن، وزني ما زايد بشكل كبير جداً جداً، لكن المشكلة ان وزني يتجمع في وجهي، لاسباب وراثية او مرضية او اي اسباب ثانية، المهم ان وجهي وجسمي اكثر شي يسبب لي احراج في حياتي..
-
قصتي من البداية، لما صار عمري عشر سنوات، بديت اسمن، لعدة اسباب بصراحة، اولها انه صار لي مصروف خاص فيني استلمه بداية كل شهر، وفي نفس الفترة كثرت مطاعم الوجبات السريعة حولنا، مثل البرغر والشاورما والبطاطا المقلي، وقرب المطاعم كلها من المسجد، يعني بعد كل صلاة “خصوصاً المغرب والعشاء” كنت امر على المطاعم واكل عندهم، كبرت وكبر معاي هالشي صرت اتفنن فالطلبات واعطي نصايح للغير في المطعم الفلاني البرغر حلو بس الشاورما لا، المطعم الفلاني الشاورما زينه بس عصايره تعبانه، حتى الشباب يرجعون لي فالمطاعم عشان يختارون الاحسن، طبعاً غير اني كنت اكل بكميات كبيرة فالبيت، صرت اكل فالمطاعم، الحمدلله كنت العب كورة العصر لمدة ساعتين وهالشي خفف من ارتفاع الوزن الحمدلله يعني ما صرت سمين بزيادة كبيرة، بس كنت سمين في جميع الاحوال..
-
صارت المطاعم شي عادي لحد ما كبرت وصارت عندي سيارة ومصروف جيد الحمدلله وصرت ازور كنتاكي وبيزا هت وباسكن روبنز بكثرة يعني اقل شي ثلاث مرات اسبوعياً (خصوصاً باسكن روبنز) ، مع زيارات شهرية لمكدونلز وهارديز وبرغر كنغ حسب المزاج، طبعاً ما راح انسى مطاعم المندي والبرياني واللي كنت استمتع فيها بشكل كبير، ولا المطاعم الهندية اللي تبيع دجاج بالزبدة وكان وجبتي المفضلة مع البرياني..
-
طبعاً من الصغر والكل يضحك على وزني من اصدقائي ، ابوي كان يقولي انحف انحف واهلي نفس الشي بس ما اخذت الموضوع بجدية، لما العب كورة في حارتنا ما اقدر الحق الكورة لاني بطيء، كنت اخر واحد دائماً..
-
طبعاً لي عدة محاولات سابقة مع الوزن، اولها في عمر عشر سنوات سنة ٢٠٠١ لمدة لا تتجاوز الشهر، بعدها رجعت اسمن، ثم محاولة ثانية في ٢٠٠٥ لكن ما استمرت ورجعت اسمن، محاولة ثالثة قوية نوعاً ما في اواخر ٢٠٠٩ لمدة شهرين بس ما استمرت للاسف، لاني ما اعرف وزني ولا خذت مقاسات بس مقلل كمية الاكل وامشي واهرول ساعة فاليوم ، بديت انحف لكن للاسف وقفت، محاولة بعدها باربعة اشهر في اوائل ٢٠١٠ مع دكتور نيوترشن خسرت فيها كيلوين ونص في اسبوع ثم وقفت.. كانت آخر محاولة فاشله ولله الحمد..
-
ما راح اخفي عليكم اني كرهت وزني بطريقة كبيرة بس ما صار وقررت اني ابدا انزل وزني، لدرجة اني كنت مرات اصيح (ابكي) لما اكون بروحي من شدة كرهي لوزني وخصاصاً منطقة الوجه، مرات لما اعصب اضرب راسي فالجدار عشان اقرر انزل وزني لكن بدون فائدة كنت لما اشوف الاكل استسلم..
-
لي معركة صغيرة مع الاكل فالسنة الثانية فالجامعة، كنت اعاني من القولون العصبي، المشكلة كانت اذا اكلت فالليل، اليوم الثاني بطني يضطرب ويسوي اصوات مزعجة تسبب لي احراج فالجامعة، يعني ما عندي حل الا اني انام بدون عشاء، استمريت بدون عشاء لمدة فصل دراسي كامل، يعني اي يوم عندي دوام بعده ما اتعشى، صرت اقدر اقاوم الجوع شوي شوي الى ان تعودت على الموضوع، لكن وزني ما نزل لاني اعوض فالنهار واتعشى فالاجازات..
-
dah1
-
وصلت سنتي الثالثة فالجامعة وانا اسمن اكثر واكثر، كنت في ذروة السمنة طبعاً اعتقد وزني تجاوز ال١١٠ (ما اعرف كم وصل بالضبط) ، وفاليوم الجيولوجي لنا فالجامعة عرفت اني لازم اوقف، كان هذا في شهر مايو ٢٠١٢، لاني لاحظت صوري وكيف كنت جداً جداً مليان وسمين مع وجهي اللي مخيف بصراحة، حتى انحرجت لما شفت زميلاتنا فالقسم ومدير الجامعة، من يومها وقلبي يقول خلاص يا محمد حان الوقت..
-
dah2
-
الف ميل تبدأ بخطوة،
رحنا صلالة رحلة مع بعض الزملاء وتكلمنا كثير عن الوزن لكن بعدها الشرارة ما ولعت عشان ابدأ، رجعت من صلالة وشفت صوري وقلت خلاص يكفي يا محمد لازم نبدا من اليوم، اليوم اطلع اركض وابدا اقلل اكل، وزنت وكان وزني في ١٥-٧-٢٠١٢ تقريباً ١٠٧ كيلوغرام، الموضوع يحتاج فقط انك تلبس ملابس الرياضة وتطلع، لبست ملابسي القديمة والجوتي القديم وطلعت امشي، وخففت اكل، كلها كم يوم وبدا رمضان، بعد اسبوع بالضبط نزلت ٢ كيلو، عجبني الموضوع قلت بشد اكثر، وخسرت اثنين كيلو اسبوعياً لمدة اربع اسابيع وفجأة تخلصت من ال٣ ارقام وصار وزني ٩٩، لكن المشكلة قبل العيد بيومين مرضت وما قدرت اسوي رياضة، بدا العيد وبدا الشكل يتغير شوي، بعد العيد مباشرة رحنا صلالة مرة ثانية وهي رحلة عائلية كنت فرحان بنفسي نازل ثمانية كيلو، الرحلة مدتها اسبوع زاد وزني فيها اثنين كيلو ورجعت الى ١٠١ للاسف، بعد الرحلة شفت صوري مع وزني الزائد وشكلي البائس وعطتني دافع اكبر، رحلة صلالة العائلية كانت اكثر شي خلاني اعزم ويعطيني دافع اكبر، لاني تضايقت جداً من شكلي، ومن يومها قررت اذا راح ارجع صلالة العام القادم، راح ارجع بشكل جديد كلياً، اسبوع بعد الرحلة وبفضل الله رجعت الى التقليل فالاكل مع الرياضة والحمدلله وصلت ٩٩ مرة ثانية، وبدأ الحماس يزيد..
-
dah4
-
بدأت السنة الدراسية الرابعة وانا محافظ على الرياضة مع التقليل من الاكل والحمدلله شهر مع شهر الوزن ينزل ببطئ لكن ينزل، على الرغم من ضحك بعض الاصدقاء والزملاء وتشجيع البعض الاخر، كنت محافظ يعني محافظ ما اخرب الا يوم واحد في الاسبوع، اسمع اللي يشجعني وما ارد على اللي يحطمني، في اكتوبر ٢٠١٢ وصلت ٩٤، في نوفمبر وديمسبر مريت بفترة تخبط وعدم ثبات نفسياً وجسدياً بصراحة، وللاسف الى يناير ٢٠١٣ نزلت ٢ كيلو فقط لانه الهمة نزلت، في يناير صارت حالة وفاة لاحدالاقارب وكنت اتغدى عيش ولحم واتعشى عيش ولحم، زاد وزني ٤ كيلو في ٣ ايام !!!
-
صرت ٩٦ ، طبعاً صدمة اني رجعت الى ٩٦، حسيت اني بديت اخسر كل شي بنيته في الفترة الماضية، رجعت الى الدايت والحمدلله وصلت ٨٨ في مارس، واصلت النزول الى اخر ابريل وقف وزني عن النزول في ٨٥ ! حاولت ازيد الى ٨٦ عشان ارجع انزله واخذ استراحة في نفس الوقت، زاد ولا طاع ينزل..
-
dah6
-
عانيت مع مشكلة الثبات على ٨٦، الحمدلله الله رزقني ناس من قسم الجيولوجيا في الجامعة يشجعوني بس بطريقة قوية، عملنا تحدي بيني انا و أحد الزميلات جزاها الله خير اذا اقدر انزل خمسة كيلو في شهر،  طبعاً ترددت فالبداية لانه وزني ثابت حالياً ! غيرت النظام الغذائي وكثفت الرياضة لاني ما اريد اخسر التحدي بصراحة كانت هذيك اكثر مرحلة قطعت فيها مسافة لاني كنت قريب جداً من المثالي وصعب انزل ٥ كيلو في شهر، والحمدلله نزلت الخمسة بتكثيف الرياضة وتغيير نوعية التغذية فكسرت ثبات الوزن الحمدلله.. خلصت السنة الدراسية في اخر يونيو وانا بوزن ٨١ الحمدلله، بعدها كثفت الرياضة وانا فالاجازة وعدلت النظام الغذائي والحمدلله نزل وزني تدريجياً الى ان وصلت في ١٥-٧-٢٠١٣ الى ٧٧ ولله الحمد..
-
الشعور الاخير: لما وصلت ٨١، بدت نفسيتي تتغير، صرت احب دايت والرياضة، الكل كان لما يشوفني ينصدم، يتفاجأ، يفرح، يشجع، وانا كنت اتشجع اكثر واكثر، صحيح ان النزول بطيء في هذي الفترة، لكن عزيمتك والارادة الداخلية تكبر اكثر واكثر، يصير عندك حافز داخلي للوصول الى الوزن المثالي، الفرحة الكبيرة اللي كنت اشعر بها لما وصل وزني الى ٧٩ شي لا يوصف، بصراحة كنت اقفز في مكاني من الفرح وانا صايم، الكل يحسبني تخبلت، وصلت ٧٨ وهو الوزن المثالي الحمدلله، لكن طمعت لانه شعور الفرحة شي غريب، وصلت ٧٧ ثم ٧٦ وحالياً ٧٥ الحمدلله.. شعور الفرحة وانت تختار ملابسك من المحلات وتكتشف فجأة ان مقاسك تحول من اكس اكس لارج الى ميديام ! فرحة تخلي عينك تدمع لان جهدك اللي بذلته وجسمك اللي تعبت عشانه بدأ يتجاوب معاك، لما تقارن ملابسك القديمة مع الجديدة شعور الفرح في هذي اللحظة شي لا يوصف بصراحة، نظرة اهلك لك تتغير، زملائك نظرتهم تتغير، تمشي وانت عندك ثقة في نفسك، تزور الناس وعندك ثقة انه محد راح يضحك على جسمك، تلبس مثل ما تريد وانت مطمئن ان مقاس ملابسك مليان فالسوق، الفرحة شي عظيم جداً جداً وهي شي لا يمكن وصفه، نزل وزنك الى المثالي وستشعر به باذن الله..
-
dah7
-
image (18)
-
dah9
-
dah10
-
dah11
-
dah12
-
همسة : الحمدلله على كل شي، و شكر خاص لكل من شجعني في رحلتي مع الوزن، كل من دفعني الى الامام في لحظات الضعف، لكم فضل بعد الله تعالى في الانتصار الذي حققته، لا انسى جميلكم ابداً، لكم مكان خاص في قلبي، شكراً لكم، ولا انسى من حاول تحطيمي، لكم شكر أيضاً، دفعتوني لاقهركم واثبت لكم بأن اليأس خلق لامثالكم..
-
نصائح عامة في رحلة الوزن:
-
ممنوعات :
١- كنتاكي، مكدونلز، برغر كنغ، هارديز، وجميع الفاست فود.
٢- المشروبات الغازية .
٣- المقالي بشكل عام مثل السمبوسة والبطاطا المقلية حتى لو فالبيت، انساها قدر المستطاع.
-
الرياضة:
فالبداية راح تواجه صعوبة فالركض، ابدا بالمشي عشرين دقيقة فاليوم، ثم ابدا ارفع المسافة تدريجياً، مع مراعاة انك تبدا تركض وتزيد مسافة الركض بشةل اسبوعي، انا بديت بركض ٥٠ متر في اول اسبوع ووصلت الى ٢ كيلو ونص بعد عشرة اشهر الحمدلله، انت وتركض تذكر الهدف ونظرة الناس لك لما تضعف وان شاء الله راح يزيد حماسك، طبعاً اذا التزمت اكثر راح تحصل نتائج افضل من نتائجي، لما تخسر ٥٠٪ من وزنك الزايد ابدا في تمارين الحديد، انا اخطأت في التأخير في تمارين الحديد وعندي ترهلات بسيطة بس تروح مع الوقت باذن الله
من المهم ممارسة الرياضة خمس مرات فالاسبوع على الاقل ولمدة ساعة في كل مرة
-
التغذية:
هي اهم عنصر في رحلتك للوصول للشكل والوزن المثالي:
١- ابدا قلل اكلك بالتدريج، فالبداية اذا كنت تاخذ خمس مغاريف رز فالسابق خذ ثلاثه من اليوم، بعد اسبوعين خذ واحد.
٢- حاول تاكل سلطة قبل لا تاكل وجبتك الاساسية.
٣- كل ما ابتعدنا عن اكل المطاعم قلت نسبة الخطورة بشكل عام، بس واجب الانتباه في اكل البيت بعد.
٤- وجبة الافطار هي اهم وجبة فاليوم ولازم تاكلها قبل الساعة ١١ صباحاً.
٥- حاول تشرب اكثر من ٣ لتر ماي (بحرارة الغرفة مب بارد ولا حار)، اذا الكمية كبيرة ابدا بالتدريج.
٦- اذا امكن لا تاكل مع الجماعة، خذ صحن صغير على جنب وحط فيه كمية مناسبة من الاكل واكله واغسل ايدك مباشرة عشان ما تكمل اكل، واذا في شخص ضحك عليك خل عمرك ما تسمعه، عشان تأدبه بالنتائج وتضحك عليه.
-
الميزان:
لازم يكون عندك ميزان فالغرفة، توزن فيه كل اسبوع مرة، انا افضل كل جمعة صباحاً قبل الافطار، عشان اذا كان وزني ناقص اخذ وجبة مفتوحة كنوع من المكافاة لي، وجبة الغداء يوم اليمعة تكون مفتوحة.
طبعاً حتى الوجبة المفتوحة ما اكل فيها الممنوعات يعني الاكل يكون من اكل البيت بس الكمية كبيرة فقط لا غير
-
نصيحة أخيرة:
كل شخص له وزنه وطوله وجيناته المختلفة، اللي ينطبق علي يمكن ما ينطبق على غيري، لكن في عامل مشترك وهو الصبر، من المهم ان تعرف ان الصبر عامل مهم، فالجسم اللي بنيته في سنوات من عمرك ما راح يختفي في يوم وليله، طبيعي ان المسألة تاخذ وقت وخذ راحتك فالموضوع وانزل شوي شوي وان شاء الله راح توصل لهدفك.
-
آخوكم محمد الظاهري.. سمين سابق
تويتر : @dh_mohammed
28939 views

عن يوسف السليمان

مؤسس الموقع ، مهتم بالتغذية والرياضة .. تخلصت من نصف وزني باتباع مبادئ بسيطة وتغيير نمط حياتي .. الدور عليك اﻵن

اضف رد

إلى الأعلى